ലുത്തിനിയാ പാട്ടുരൂപത്തിൽ

കർത്താവേ കനിയണമേ
മിശിഹായേ കനിയണമേ
കർത്താവേ ഞങ്ങളണയ്ക്കും
പ്രാർത്ഥന സദയം കേൾക്കണമെ

സ്വർഗ്ഗപിതാവാം സകലേശാ
ദിവ്യാനുഗ്രഹമേകണമേ
നരരക്ഷകനാം മിശിഹായേ
ദിവ്യാനുഗ്രഹമേകണമേ

ദൈവാത്മാവാം സകലേശാ
ദിവ്യാനുഗ്രഹമേകണമേ
പരിപാവനമാം ത്രീത്വമേ
ദിവ്യാനുഗ്രഹമേകണമേ

കന്യാമേരി വിമലാംബേ
ദൈവകുമാരനു മാതാവേ
രക്ഷകനൂഴിയിലംബികയേ
പ്രാർത്ഥിക്കണമേ ഞങ്ങൾക്കായ്

നിതരാം നിർമ്മല മാതാവേ
കറയില്ലാത്തൊരു കന്യകയേ
നേർവഴികാട്ടും ദീപശിഖേ
പ്രാർത്ഥിക്കണമേ ഞങ്ങൾക്കായ്


നിത്യമഹോന്നത കന്യകയേ
വിവേകമതിയാം കന്യകയേ
വിശ്രുതയാം സുരകന്യകയേ
പ്രാർത്ഥിക്കണമേ ഞങ്ങൾക്കായ്

വിശ്വാസത്തിൻ നിറകുടമേ
കാരുണ്യത്തിൻ നിലയനമേ
നീതിവിളങ്ങും ദർപ്പണമേ
പ്രാർത്ഥിക്കണമേ ഞങ്ങൾക്കായ്

വിജ്ഞാനത്തിൻ വേദികയേ
മാനവനുത്സവദായികയേ
ദൈവികമാം പനിനീർസുമമേ
പ്രാർത്ഥിക്കണമേ ഞങ്ങൾക്കായ്

ദാവീദിൻ തിരുഗോപുരമേ
നിർമ്മല ദന്തഗോപുരമേ
പൊന്നിൻ പൂമണിമന്ദിരമേ
പ്രാർത്ഥിക്കണമേ ഞങ്ങൾക്കായ്

വാഗ്ദാനത്തിൻ പേടകമേ
സ്വർല്ലോകത്തിൻ ദ്വാരകമേ
പുലർകാലത്തിൻ താരകമേ
പ്രാർത്ഥിക്കണമേ ഞങ്ങൾക്കായ്

രോഗമിയന്നവനാരോഗ്യം
പകരും കരുണാസാഗരമേ
പാപിക്കവനിയിലാശ്രയമേ
പ്രാർത്ഥിക്കണമേ ഞങ്ങൾക്കായ്

കേഴുന്നോർക്കു നിരന്തരമായ്
സാന്ത്വനമരുളും മാതാവേ
ക്രിസ്തുജനത്തിൻ പാലികയേ
പ്രാർത്ഥിക്കണമേ ഞങ്ങൾക്കായ്

വാനവനിരയുടെ രാജ്ഞി
ബാവാന്മാരുടെ രാജ്ഞി
ശ്ലീഹന്മാരുടെ രാജ്ഞി
പ്രാർത്ഥിക്കണമേ ഞങ്ങൾക്കായ്.
.
കന്യകമാരുടെ രാജ്ഞി
വന്ദകനിരയുടെ രാജ്ഞ
രക്താങ്കിതരുടെ രാജ്ഞി
പ്രാർത്ഥിക്കണമേ ഞങ്ങൾക്കായ്.

സിധ്ദന്മാരുടെ രാജ്ഞി
ഭാരത സഭയുടെ രാജ്ഞി
അമലോദ്ഭവയാം രാജ്ഞി
പ്രാർത്ഥിക്കണമേ ഞങ്ങൾക്കായ്

ശാന്തിജഗത്തിനു നൽകും
നിത്യവിരാജിത രാജ്ഞി
സ്വർഗ്ഗാരോപിത രാജ്ഞി
പ്രാർത്ഥിക്കണമേ ഞങ്ങൾക്കായ്,


ലോകത്തിൻ പാപങ്ങൾ താങ്ങും
ദൈവത്തിൻ മേഷമേ നാഥാ,
പാപം പോറുക്കേണമേ

ലോകത്തിൻ പാപങ്ങൾ താങ്ങും
ദൈവത്തിൻ മേഷമേ നാഥാ
പ്രാർത്ഥന കേൾക്കേണമേ

ലോകത്തിൻ പാപങ്ങൾ താങ്ങും
ദൈവത്തിൻ മേഷമേ നാഥാ,
ഞങ്ങളിൽ കനിയേണമേ